Boyfriend Material Naman Ako

Isa sigurong dahilan ng pagiging single ko hanggang ngayon ay dahil marami pa akong di alam gawin. Marami naman na akong alam na gawaing bahay, pwede na nga akong mag-asawa eh. Marunong akong magluto ng Lucky Me noodles, may sabaw o kahit pancit canton, kaya ko na. Mahusay na rin akong magpakulo ng tubig, lalo na kung de-sipol yung kettle. Magaling din ako magprito ng itlog, lalo kapag ginawa ko na yung specialty kong crunchy omelette, yung may eggshells pa. Wala kasing gumagawa nun ako lang. Kaya ko rin namang labhan ang mga brip ko. Napag-aralan ko na rin ang mag-alaga ng bata, napagpraktisan ko na kasi ang talent kong ito sa My Baby-All-Gone na manika at lalo na sa paglalaro ko ng tamagotchi. Kaya ko rin namang ipagtanggol ang mga minamahal ko, kayang-kaya ko ang mga ginagawa nila Shaider at ng mga Bioman. Sa kanila ko natutunan ang martial arts. Pero siguro nga marami pa kong di alam. Kaya nga heto pinapanood ko kung paano magtupi ng damit. Pinag-aaralan ko na ring mamalantsa. Lahat kaya kong gawin para lang sa aking iniirog.